這是絕對真人真事！(雖然有加鹽加醋調下味)
貓Sir 在午飯時間入到教員室，大喊：睇我今日搵到乜好0野？問曰：有乜咁厲害？又有學生上課偷食薯片被你充公？
貓Sir：唔係……薯片只係碎料。呢樣野近期好紅的－－
再問：唔通係可連線對打的NDS遊戲機？如果係就真係濕濕碎－－我琴日先沒收左兩部，今日約左學生個家長親自0黎要返。
貓Sir：學生書包有遊戲機都唔係新聞啦。
三問：咁係乜0野？唔通有飛機大砲咩？
貓Sir ：差唔多啦！就係呢樣－－
嘩！
乜學校幾時咁威，威過《逃學威龍》！難道學校裡面有一個小型軍火集團？
接著，貓Sir 講今日的經歷：
話說他走入中一的課室，就見到有個學生拿著一枝手鎗追指著另一個同學的頭！情況應該有點似《無間道》陳永仁在天台用鎗指著劉健明後腦那一幕……
貓Sir 即刻出面阻止，沒收，並且嚴厲責罵。但那個中一生仍是老樣子，毫無悔意，而且有種捨身成仁的英雄得戚樣。
貓Sir 罵完之後順勢要學生去訓導處，這時，同學舉手向貓Sir 再告發－－那學生的書包裡還有另一枝一模一樣的手鎗！
莫非是《買兇拍人》那個「雙鎗雄」？
貓Sir 打開書包，發現原來學生真係吳宇森 Fans，用鎗都要帶兩柄……難怪學生被收了一枝鎗後仍面有得戚。
有老師說要把這枝鎗放在訓導組「傍身」，亦有老師想商借手鎗去對付自己班的學生－－四十粒子彈用來射學生，最後一顆留給自己。
思定後來也要了那枝鎗來拍照，但心盤算著：陣間放工走過旺角War Game舖要去買件避彈衣，或者響應美國鎗會呼籲，在公事包裡放一枝曲尺手鎗……
唔知條數可唔可以響科組的「教學用品」度出左佢？最多我做埋Quotation。^^
你都知，雖然我係打份工，但事實有 D錢又真係唔慳得！
