1. 聰明‧笨伯
2. 大頭體與火星文
3. 學生大Q晒之 Never Blame Your Students...
4. 正能量
1. 聰明‧笨伯
學校召開「士大夫」(Staff Meeting) 會議，遲到留堂班沒有人留守。思定晨早接到命令，放學後戍守留堂房。
學校有個奇怪規定：凡留堂者必要作文。文章的題目不限，字數則最少要300。
學生：「阿蛇！今日作文題目係乜？」
思定：「哦……今日作文題目：如何戒絕遲到壞習慣。」
學生：「0下，咁深！」
思定：「嫌深？不如這個：我最難過的時刻。」
學生：「咁難！」
思定：「咁你自己揀啦？」(遞上作文題目簿，內容全是勵志文章，但亦有頹廢題如《週記一則》)
學生：(隨便看了幾眼)「咁悶？」
思定：「咁？你想作甚麼？阿蛇今次任得你作……」
學生：「我唔知啊！」(狀甚苦惱)
思定：(想用逼的方法)「唔知作乜，咁，(發晦氣)不如你去罰抄自己個名三百次啦！」
學生：「唔……(回位)……」
思定以為奸計得逞，豈知？
夠鐘！
學生：「阿蛇！我交得。」
思定接過原稿紙，上面密密麻麻地寫著那同學的名字。
「喂！阿乜同學，你真係抄三百次自己個名？」
「係啊！又係你話得0既……」
「我點 (停頓五秒，過濾粗口) 知你會咁贛居？你識唔識計數嫁？你用0下腦諗真D：作篇文不過三百字，但你個名有三個字，抄三百次即寫了九百個字－－你蝕了六百個字俾我喎！」
同學：「阿蛇！你咪斤斤計較啦！同你咁熟 (其實我係第一次見佢) ，果六舊當我豪俾你。抄名唔駛用腦嘛！作文呢家0野，好傷神嫁！」
思定：「……(吹脹中
)……」
2.大頭體與火星文：
思定習字多年，雖然寫來馬馬虎虎，但是雙眼仍然可以分辨字體。然而，我發覺近年學生交來的功課，多了一種全新的字體，無以名之，姑且曰：大頭體。
這種Cute 大頭體的字，主要是把一個正常的中文字，不論本來是長方型還是正方型，全部寫成正方型，再將四隻角修圓，然後把左上角的第一筆誇張，佔整個字的四份之一，使得整個字的頭變大，然後令到整個字變得像大頭娃娃般「可愛」。
另外，學生的文句亦多了一種語言：火星文。例句：吳尊「巧」「令」仔啊！
「巧」=「好」。「令」=「靚」。
「靚」是廣府話，雖然這個字《詩經》都有用，非常古雅，然而現時它只限於中國沿海一帶使用。
看著電腦室的女學生一字排開，電腦熒幕清一色：飛輪海，心想，你們支持吳尊，都請寫好中文－－否則吳尊唔會睇得明你寫乜？
3. 學生大Q晒之Never Blame your students …
或者大家都見到，呢個Blog 的副標題由原來夏丐尊的「命苦不如趁早死；家貧無奈做先生」，變成：「Never Blame your students」。究竟這句有何典故？
或者可能大家都有聽過。
對。那是 Kong U 教育學院PGDE教導學生的今期主打座佑銘。
思定本來都不知，不過剛來實習老師的Jennifer 告訴我的。聽過之後，我當然只有不停地打哈哈。
想起早陣子聽《光明頂》提到「學店」與「學校」的分別，講到以前是學生要取悅老師，以求即使學不到十成真傳都可以有半桶水傍身，現在則是老師要把學生當神咁拜，以防佢學期尾唔磅水過你。
總之，學生太Q 晒，顧客永遠是對的。今時今日咁0既服務態度唔得嫁啦，That’s Right ! Never Blame Your Students. 是的。Yes. Sir ! Sorry, Yes, Student!
老師(潛)守則：
第一條：學生永遠是對的。
第二條：學生永遠沒有錯。
第三條：如果學生有錯，請返回第一條。
第四條：如果學生有錯，一定是老師的錯。
當然，我唔係話做老師一定是對的，然而同樣道理，學生都唔一定無錯。至於是否要用到「鬧」？我只想起果時李小龍逝世唔知幾多週年，電視台重播他的舊片，裡面有句對白：「錯，就要認。打，就要企定。」噢！強如李小龍都要瓜柴，The Good Old Days看來已經一去不返了。
有時見到學生很無恥，與禽獸無分別，明知自己打人欺負同學唔交功課打爛0野，當你義正嚴辭好聲好氣咁同佢講：「咁你覺唔覺得自己做得唔0岩先？」只想他說一句細細聲「是的。對不起。」，或者，只要點點頭就夠。
但是他們仍可以理直氣狀，面不紅氣不喘地說：「我唔覺……」當然，一到了要扣分見家長時，他們卻會扮死狗。不過扮死狗的已經很好，因為有些直頭會講：「阿蛇你好叉煩啊！唔好講埋晒 D人生大道理，你要扣分就扣，扣完寫紙簽個名就俾返我。我趕時間，唔係好得閒嫁渣！」
呢個時候，我都覺得自己好煩，講到口臭，阿蛇直情變了一條大蛇。
結果，無可避免地，老師就只能在理想與現實、自責和教育制度之間磨0下磨0下。
Come On ! Just Relax ! Never Blame Your Students… If Someone Should be Blamed, Blame their Parents Or … the Government !!
4. 正能量
怨氣太多，應該發放些少正能量。
留堂班也不是沒有好東西。
做好呢份工，夠鐘即刻鬆！一代鐘神；夠鐘走人。思定瞄了一眼手錶，合上手提電腦，準備收工，趕去油麻地睇五點二十分開場的《姨媽的後現代生活》。
已經空無一人的留堂房門外，一個全身白衫被簽滿了不同顏色的簽名的同學跑入來。
「唔好意思！我有事遲左黎！阿蛇！今日仲有無留堂班？」
我腦海閃過赤村次郎有個關於外賣的短篇小說，講一個男人三更半夜聽到電話響，另一邊有把女聲問有無叉燒拉麵，然後男人明知對方打錯(因為男人已經不是第一次聽到，他知對面街的拉麵店電話與自己的只是一字之差)。
男人膚衍佢話「有~」，然後幪頭大睡，夢中見到有個女人因為買唔到叉燒拉麵而被老公拋棄，憤而放火燒了對面街的拉麵店，把拉麵店東主一家全部燒死……
「有。當然有。」
我知那個同學的衫之所以被劃到花哩花碌因為佢係中五的同學－－今日正好是中五級的 Last Day，過了今日，他們就要面對會考，然後他們當中有很多都會各散東西，老死不相往來……
思定說：「其實你唔駛來……反正過埋今日，所有數都會一筆勾銷。不如你簽個名，我當你來過就算啦。」
學生說：「0下？咁……唔好0既，我應承過阿魚Sir－－我儘量留啦。」
思定望望手錶－－下一場應該是七點十五分－－再望望個學生，見佢已經坐下來。我打開留堂簿，拿出一張原稿紙，連同我慣用的原子筆遞到學生面前，說：
「作文題目－－就呢個啦：我最敬佩的人。」
