每逢有老師請假，教學助理便首當其衝---被抓去代課。
今天，我便被指派去1C班。甫進課室，便聽見震耳欲聾的歡呼聲，不用說，學生知道自己不用上堂，固然是欣喜若狂了。
我著他們安靜地做自己的事，他們為了保留這份自由，都顯得十分合作。而我亦百無聊賴，便背手而行，到處探頭探腦，偶爾搭搭訕。
「阿sir，有冇玩開股票咁呀？」
坐在最前的一位男同學，臥著倚背，蹺著腿笑意盈盈的問我。
「冇喎，做咩呀？」
「冇，諗住學o下玩股票，想搵人教o者﹗」
「你有錢咩？」
「有呀，先排的利是錢，再加上之前儲左o的。」
「咁你有錢唔買其他野？PSP、NDSL、WII呢？」
「唉，o個o的我有啦，都冇咩特別。同埋我都大個啦，唔玩呢o的野。阿sir，而家投資好呀，你諗o下，如果我而家……到我二十歲就…三十歲就…」
看來他的計劃十分周詳。 我在想，小朋友心智早熟，我並不認為是一件壞事。但從這個個案來看，我相信他是已經不能在一般小孩子的玩意上獲得滿足，而且對於那種低層次的官能刺激已感厭倦，從而覺得自己已有別於同齡的孩童，自覺比他們優越、比他們成熟，而自覺高人一等便要做一些高人所做事，他認為這樣才能對襯身份。
我不想挫他的興緻，但也沒興趣聽他的偉論。
我說：「咁你會買邊隻？」
「梗係同中國有關既股票啦，好似中國人壽、中國移動、中國石化、中國聯想，總之個名有中國呢兩個字就冇衰o架喇﹗」
噢…「咁，你有幾多錢？」
「唔……加加埋埋都有幾千o架﹗」
我相信佢會好快打番wii。
